超渡

　　一生漂泊，巫根源回到高雄小林村與家人團聚。
　　但風雲不測，颱風夜共聚天倫之際，
　　巫根源竟葬身滅村洪流之中。

　　仁德翻開根源阿叔留下的記事本，
　　三本人生自傳，是一代台灣人、台美人的流轉足跡，
　　也是台灣歷史命運的見證。

　　經歷二二八、白色恐怖與美麗島事件，
　　台灣人自黨國洗腦之中警醒。
　　平埔族後裔在政治與文化的浩劫中，
　　也將重新釐清身世與記憶，
　　化除殖民與漢化的窒礙，尋回原初的信仰，
　　看見文化原鄉的光芒。

　　火金姑台語文學基金 贊助出版③

作者簡介

崔根源

　　本名吳金德，1938年佇高雄茄萣仔出世，台大法律系畢業，北達科大州大學J. D.，北達科大州律師公會會員，經商，定居美國加卅。1997年開始台語小說創作，著有短篇小說集《水薸仔的夢》、《人狗之間》，長篇小說《倒頭烏佮紅鹹鰱》、《無根樹》、《回顧展》及本書《超渡》。

天有不測的風雲

不計其數，白綿綿的雲絮(su)，親像囝仔蹉跎(tshit-thô)圍咯雞圍一個一望無際的大圓箍仔，重(tîng)重疊(tha̍h)疊，厚閣實(tsa̍t)，蘊(ùn)釀一個極強烈的風颱，雲陣踮關島的西北海面拍箍仔，向巴士海峽的北爿面台灣島的東南蠢蠢躍(io̍ok)動，氣象預告，莫拉克颱風登陸台東了會輕移蓮步，踮中央山脈的天頂停喘。

八八節，我唯高雄趕轉去小林村，風颱天湊(tshap)湊仔雨，高雄的天氣鬱悶甲欲斷氣，入山了後，雨粒變大粒閣掃山風，心涼開花，袂記有外久無佮阿兄見面啦，幾偌個月前踮高雄撞(tn̄g)著仁德，阿兄的第二後生，伊講阿叔阮爸也數念欲閣佮你見一遍仔面，閣講父親節怹兄弟姐妹仔欲共爸也做八十大壽請我做伙去鬥鬧熱，我對喙道共仁德應好，昨暝我佮踮菲律賓的Sam，無國界醫生聯盟的好友，有電話聯絡，伊提起莫拉克，講伊聽CNN颳風預報，怹警告莫拉克會帶予台灣親像四十暝日的大洪氾，我笑應，Sam你踮菲律賓予風颱驚破膽去，風颱踮台灣是家常便飯，Sam關懷，叫我較小心咧！

公孫仔叔孫仔坐坐咧滿滿二塊桌，有山產阿有海產，有小米酒阿有Scotch，大人囝仔查甫查某人人有份，大家阿食阿喝咻，坐咧飲無夠喟，徛徛起來跤舞手舞，一個人家己跳無夠看，大人囝仔做伙手牽手圍箍仔踢跤咿喲咿喲較有風光。阿兄斟(thîn)咧半碗小米酒，大漢新婦閣專工炕(khòng)一鍋(ue)爛爛的鮮蕃薯糜，我無張池聽著伊嗽甲強欲無喟，夯頭共問，伊出力掙(tsìnn)出來講伊食的飯粒仔走毋著路，停一時仔，笑笑，小弟仔！敢會是天公伯仔袂記持共我的名字列入名冊？過八十啦，活傷久啦！阿兄對死無禁忌，毋過我嘛是喙口安慰長壽好命，連鞭道欲五代同堂啦！